agarche jaan ka khatra nai udan mein tha
parinda phir bhi bahut dur aasman mein tha

mili jo manzil-e-imkan ba-justuju-e-hazar
ajib nashsha safar-dar-safar takan mein tha

usi ne ghar ke charaghon ki lau badhai hai
shumar jis ka kabhi nang-e-khandan mein tha

main dushmanon se har ek lamha tha bahut mohtat
milega zakhm rafiqon se kab guman mein tha

main tang aa ke tattul se dhup mein nikla
sukun-e-qalb-o-nazar yun to saeban mein tha

'nasim' chashm-zadan mein zamin pe aan gira
agarche tir-e-sitamgar abhi kaman mein tha