ahl-e-duniya ne sikhaya mujhe hairan hona
kaise insan hain ki aata nahin insan hona

kya teri zulf-e-siyah-tab ko ai maya-naz
gham-e-ulfat se bhi aata hai pareshan hona

ghairat-e-mehr kaha un ko to hans kar bole
kaise manzur ho ab sham-e-shabistan hona

aur husn-e-gham-e-hasti ko badha deta hai
shauq-e-gesu mein tere dil ka pareshan hona

na bahaaron se gharaz hai na khizan se matlab
sikh le mujh se koi khar-badaman hona

meri danist mein tauhin-e-gunahgari hai
ai gunahgar gunahon pe pasheman hona

qar-e-dariya mein bhi ek sahil-e-rahat hai nihan
bhul hai mauja-e-tufan se hirasan hona