ai dil bata ye un ki nawazish hai ya nahin
wo dard mil gaya hai ki jis ki dawa nahin

khush-fahmiyon ko dil ne faramosh kar diya
ye aur baat hai ki tumhein bhulna nahin

mauf kar diya hai ghamon ne dil-o-dimagh
ab to hamein khayal kisi baat ka nahin

zabt-e-alam pe harf na aane diya kabhi
aankhon se ek ashk bhi ab tak gira nahin

maujon ko kya khabar hai jo hain sath-e-ab par
dariya mein jo chhupa hai wo tufan utha nahin

nairangi-e-jahan ka kahan tak mushahida
ai fursat-e-nigah tera ji bhara nahin

ye zist ka safar bhi 'munawar' ajib hai
manzil hai kitni dur hamein kuchh pata nahin