ai dil is ka tujhe andaz-e-sukhan yaad nahin
wo phiri aankh wo mathe ki shikan yaad nahin

qaid-e-sayyaad mein jab se hun chaman yaad nahin
dost hain ahl-e-qafas ahl-e-watan yaad nahin

hijr mein dil ke hamein dagh-e-kuhan yaad nahin
muskuraate hue phulon ka chaman yaad nahin

wo khunuk chandni raaten wo faza aap aur main
aur wade wo lab-e-gang-o-jaman yaad nahin

main wo nakaam musafir hun jahan mein jis ko
sham-e-ghurbat ke siwa subh-e-watan yaad nahin

aarzu dost ki bekar hai ghurbat mein 'rashid'
aap ko haalat-e-yaran-e-watan yaad nahin