ai ishq ab to main tere qabil nahin raha
jis dil pe naz tha mujhe wo dil nahin raha

ai khizr-e-rah chal mujhe le chal jahan chale
ab mujh ko hosh-e-jada-e-manzil nahin raha

allah ho khair qais ki barbaadiyon ki khair
laila pe aaj parda-e-mahmil nahin raha

tegh-e-jafa utha are qatil utha utha
ab sabr-e-jazb-e-ulfat-e-kaamil nahin raha

qatil tere to war ne kar hi diya ghazab
bismil tadap ke chal diya bismil nahin raha

main kis liye hun koshan meri kashti-e-wafa
tufan wo utha hai ki sahil nahin raha

ai 'prem' ab na puchh gham-e-dil ki dastan
ab dastan-e-gham na rahi dil nahin raha