ai khuda aisa moajiza ho koi
ishq mein mere mubtala ho koi

is tarah dekhta hun main us ko
jis tarah khwab dekhta ho koi

ain mumkin hai is ghazal mein sher
mere hissa ke kah raha ho koi

rab ka jo har kaha qubul kare
us ke honton pe kya gila ho koi

gum-shuda likh ke ek parche par
meri taswir bantta ho koi

shab-e-furqat ka gham liye ghar mein
aaj ki raat jagta ho koi

dastaras mein nahin hai chain-o-sukun
zindagi gham ka silsila ho koi

jhum uthte hain dekh kar us ko
naghma-e-zindagi nasha ho koi