utar kar aaegi aangan mein yaro chandni kab tak
jala kar khun-e-dil apna karen hum raushni kab tak

jo mai-asham hain pyase palat aate hain mahfil se
rahega dast-e-zahid mein nizam-e-mai-kashi kab tak

jala kar shama par shama koi diwana kahta tha
main dekhunga ki ab mitti nahin hai tirgi kab tak

ye gulshan ke muhafiz ye lutere rang-o-nikhat ke
karenge is tarah nilam phulon ki hansi kab tak

khada hai aaj har insan armanon ke maqtal mein
saza jine ki paegi na jaane zindagi kab tak

mohazzab jaanwar tahzib ke jangal ka bashinda
lahu pita rahega aadmi ka aadmi kab tak

qalam se kaam lena chahiye talwar ka 'rizwan'
faqat tafrih ki khatir ye sher-o-shaeri kab tak