ai naseho na aur koi guftugu karo
gar ho sake to chaak-e-gareban rafu karo

hoti nahin hai yunhi ada ye namaz-e-ishq
yan shart hai ki apne lahu se wuzu karo

phir jis tarah bhi chaho karo hum pe tabsira
pahle hamari tarah se jine ki khu karo

phir koi le gaya hai charaghon ki raushni
ta-subh aaj apne jigar ko lahu karo

wo to nahin ye us ka hi ham-shakl hai koi
ab us ki chal ke aur kahin justuju karo

aaj us hasin se mil ke ajab kaifiyat mein hun
koi raqib ho to mere ru-ba-ru karo