ek taklif pas-e-qalb-o-jigar hoti hai
aksar is tarah se bhi raat basar hoti hai

main gham-e-shab ko basar karta hun mushkil se miyan
shab guzarte hi kisi dukh se sahar hoti hai

naseha kuchh to kami hogi teri baat mein bhi
is liye teri nasihat be-asar hoti hai

de to sakta hun jawaban main tujhe bhi gali
mere kirdar ki tauhin magar hoti hai

silsila hai ye mohabbat bhi mukafat hi ka
jo idhar hoti hai haalat wo udhar hoti hai

aate hain kitne hi dushwar marahil 'hamza'
tai jo ki jae to tai rahguzar hoti hai