ai rashk-e-gul-e-tar tu kabhi dekh idhar bhi
kafi hai mere dil pe teri ek nazar bhi

ai jaan-e-jahan tera pata khak lagaen
jab hum ko mohabbat mein nahin apni khabar bhi

ek umr se hum kushta-e-alam-o-sitam hain
ho jae kabhi hum pe inayat ki nazar bhi

wo mil na sake hum ko kahin dasht-o-jabal mein
dhunda hai unhen hum ne sar-e-rahguzar bhi

hum husn ke bande hain parastar-e-mohabbat
paenge hamein aap chale jaen jidhar bhi

go tishna-dahan muhr-ba-lab baithe hain saqi
hum bhi tere bande hain koi jam idhar bhi

wo apni jafaon pe pasheman hai 'rahbar'
masum si aankhon mein hai shabnam bhi sharar bhi