ai sanam tujh ko hum bhula na sake
dil se dagh-e-wafa mita na sake

allah allah us aastan ki kashish
sar jhukaya to sar utha na sake

mit gae shauq-e-did mein lekin
aap jalwa hamein dikha na sake

teri chahat mein dard wo paya
hum zamane mein chain pa na sake

de ke dil tum ko jaan bhi de di
phir bhi apna tumhein bana na sake

jab se nisbat hui tere dar se
hum kisi dar pe sar jhuka na sake

ishq mein ye ajab tamasha hai
un ko paya to khud ko pa na sake

aisi badli hawa zamane ki
zakhm sine ke muskura na sake

tum 'fana' ki lahad pe baad-e-fana
aa ke do phul bhi chadha na sake