ai shaikh mujh ko khwahish-e-bagh-e-iram nahin
kucha buton ka mere liye us se kam nahin

pahli si us mein aadat-e-jaur-o-sitam nahin
afsos ab yahi hai ki is waqt hum nahin

han ku-e-ghair mein tere naqsh-e-qadam nahin
tujh par mera guman khuda ki qasam nahin

mujh nim-jaan ke qatl mein takhir is qadar
malum ho gaya tere khanjar mein dam nahin

nalo tumhaare hath hai furqat mein apni sharm
dekhen to aaj charkh nahin hai ki hum nahin

aab-e-baqa ho mujh ko pilao jo aab-e-tegh
tum zahr bhi jo do to wo amrit se kam nahin

karta hai mujh se ahd-e-wafa to wo but magar
mujh ko kuchh e'tibar khuda ki qasam nahin

mumkin nahin kahin ho thikana 'fahim' ka
teri nigah-e-lutf agar ai sanam nahin