aisa bhi koi kare hai khalal mulk-e-din mein but
hargiz main us ki shakl ka dekha na chin mein but

mazhab mein mere shaikh ke itna hi farq hai
main hath mein rakhun hun to wo aastin mein but

din ho gaya ba-kufr badal yan talak ki khalq
rakhe hai ja-e-qibla-numa ab nagin mein but

sajda kare khuda ko to kijo samajh ke shaikh
ab bhi gade hue hain hazaron zamin mein but

jaun tawaf karne ko kyon kar main 'mushafi'
kabe ke taq mein hai mere hai nagin mein but