aisi bhi kya udi hai khabar dekh kar mujhe
sab pherne lage hain nazar dekh kar mujhe

kyon chhut nahin raha hai siyah-raat ka dhuan
kyon munh chhupa rahi hai sahar dekh kar mujhe

donon hi ro pade hain sar-e-mausam-e-khizan
main dekh kar shajar ko shajar dekh kar mujhe

manus ho chuka hai meri aahaton se ghar
khul ja rahe hain aap hi dar dekh kar mujhe

yun to hazar ranj the shikwe gile bhi the
kuchh bhi na kah saka wo magar dekh kar mujhe