ajab hasrat se takte hain nagar ke band dar mujh ko
chala jata hun le jati hai tanhai jidhar mujh ko

samajhte hain wo leader ya koi darwesh-e-mastana
koi khinche idhar mujh ko koi khinche udhar mujh ko

kyon ek manzil pe thahra hun hai ye israr be-mani
koi mujh se to puchhe aakhirash jaana kidhar mujh ko

main kitni dur aa pahuncha hun andaze se kya hasil
sada lagti hai khamoshi bulae lakh ghar mujh ko

main sada-lauh main na-waqif-e-jurm-o-saza phir bhi
na jaane kis liye dhunde hai ye sara nagar mujh ko