ajab nahin hai tamanna-e-mo'atabar hona
har ek shajar ki zarurat hai bar-war hona

mujhe yaqin ki manzil se dur rakhta hai
misal-e-mauj-e-hawa mera dar-ba-dar hona

koi kami to hai baqi jahan-e-hasti mein
bata raha hai ye mitti ka chaak par hona

hazar-khanon mein taqsim kar raha hai mujhe
tumhaari yaad ka dil se idhar udhar hona

thahar gaya tha shab-e-kam-nigah mein 'asim'
hamare khun se charaghon ka mo'atabar hona