ajab si gard jami hai yahan fazaon mein
ki jaise dhund mili ho kahin hawaon mein

jo manzilon ke nishanat de rahi hain tumhein
hamari gunj bhi shamil hai in sadaon mein

kisi ke hijr mein aankhen nikhar gain apni
ye bhig bhig ke dubi rahi duaon mein

unhi ke yaad mein rahta hai chand bhi shadan
wo jin ki khushbu abhi tak hai mere ganw mein

wo jis ko kahte the tahzib mar chuki 'asim'
panah dhundiye ja kar kahin guphaon mein