ajab surat se dil ghabra raha hai
hansi ke sath rona aa raha hai

mujhe dil se bhulaya ja raha hai
pasine par pasina aa raha hai

murawwat shart hai ai yaad-e-jaanan
tamannaon ka ji ghabra raha hai

meri ninden to aankhon se uda din
magar khud waqt soya ja raha hai

adab kar ai gham-e-dauran adab kar
kisi ki yaad mein farq aa raha hai

ye aadhi raat ye kafir andhera
na sota hun na jaga ja raha hai

zara dekho ye sarkash zarra-e-khak
falak ka chand banta ja raha hai

'siraj' ab dilkashi kya zindagi mein
ba-mushkil waqt kata ja raha hai