ajab tu ne jalwa dikhaya mujhe
ki aalam mein phir kuchh na bhaya mujhe

karun kya bayan main ye ehsan-e-ishq
ki qatre se dariya banaya mujhe

fida hun main us naz-e-jaan-bakhsh par
ki jun jun mua mein jilaya mujhe

teri zulf-e-pechan ne ai rashk-e-gul
hazaron bala mein phansaya mujhe

rulaya kabhun mujh ko manind-e-abr
kabhun barq-asa hansaya mujhe

jo apne tain main ne dekha baghaur
sarapa nazar tu hi aaya mujhe

main hun shah-e-khadim par 'asim' fida
ki jun jun main bigda banaya mujhe