ajnabi se chehron par aashna si aankhen hain
aashna se chehron par kuchh khafa si aankhen hain

zard zard mausam se tishnagi jhalakti hai
phul hain khizaon ke aur pyas aankhen hain

palki bahaaron ki aane wali hai shayad
nim-wa darichon mein aaina si aankhen hain

phir chala hai dil le kar khwab-nak rahon par
mere chaar-su ab wo rahnuma si aankhen hain

yaad ki hasin kirnen jagmagain aangan mein
dil ka istiara to wo dua si aankhen hain

hont khushk hain mere aur qadam 'sadaf' zakhmi
raat ka safar hai aur be-ziya si aankhen hain