alam ki baat se aazar-e-jaan se kuchh nahin hota
wo aalam hai ki ehsas-e-ziyan se kuchh nahin hota

waqar-e-gulsitan ki pasdari baat hai warna
chaman ke nam par husn-e-bayan se kuchh nahin hota

amal ki quwwat-e-taskhir se duniya badalti hai
shikayat-ha-e-jaur-e-asman se kuchh nahin hota

yaqin mohkam agar ho gardish-e-dauran badal dale
guman kitna hi badh jae guman se kuchh nahin hota

nazar sayyaad ke haalat par rakhna zaruri hai
faqat tazin-e-shakh-e-ashiyan se kuchh nahin hota

jahan haalat par tanqid hi karna zaruri ho
wahan ranai-e-husn-e-bayan se kuchh nahin hota

jahan dar-o-rasan ki baat mauzu-e-sukhan thahre
wahan ulfat ki rangin dastan se kuchh nahin hota

wahan aksar kalam-e-narm-o-shirin khub hota hai
ki aksar jis jagah tegh-o-sinan se kuchh nahin hota

ba-nam-e-ishq jazb-e-jaan-faroshi ki zarurat hai
musalsal sajda-ha-e-astan se kuchh nahin hota

mohabbat mein ek aisa waqt bhi aata hai insan par
ki jab taskin-e-dil aaram-e-jaan se kuchh nahin hota

kisi bhi taur ab taskin ki surat nahin banti
kisi bhi mehrban na-mehrban se kuchh nahin hota

nasheman phunk hi dala 'qamar' jab apne hathon se
ab aati hai to ab barq-e-tapan se kuchh nahin hota