bosa us but ki jabin ka liya chandan ho kar
hua ham-dosh main zunnar-e-barahman ho kar

barsa karte hain judai mein teri barson tak
abr-e-dida kabhi bhadon kabhi sawan ho kar

gora rukh bose se nila hua aur ghaiz se surkh
nastaran ban gaya lala gul-e-sausan ho kar

dastaras pa na saka jab kabhi dhab se haihat
pahuncha dil said-e-mahbub mein kangan ho kar

dosti ki dil-e-hamdard ne bedard se aah
dushmani dost ne ki 'mushtari' dushman ho kar