dil mein tumhaare dard ka ab silsila nahin
tum mil gae to koi bhi mujh ko gila nahin

daulat thi mere pas to yaron ka tha hujum
ghurbat mein koi ab mujhe pahchanta nahin

garmi ne khak kar diya har ek aashiyan
masum panchhiyon ka koi aasra nahin

saj-dhaj ke kaise nikle hamari ghazal janab
is anjuman mein hae koi aaina nahin

mumkin hai manzilon se bhatak jaun main 'qamar'
rah-e-safar mein mera koi rahnuma nahin