alfaz guftugu ke liye ab nahin rahe
mahsus ho raha hai mere lab nahin rahe

mana ki fasle hain bahut phir bhi ye bata
hum tere sath sath bhala kab nahin rahe

kuchh der guftugu mein to shaista wo raha
phir yun hua ki hum bhi mohazzab nahin rahe

teshe se koi dudh ki nahren nikal de
hathon mein ab wo ishq ke kartab nahin rahe

hathon ko us ki fath ki khatir utha diya
dekha ki us ke tir-o-kaman jab nahin rahe