burrish-e-tegh bhi hai phul ki mahkar bhi hai
wo khamoshi ki jo sad maujib-e-izhaar bhi hai

chhodiye un ke shab-o-roz ki rudad-e-zubun
aap ko khak-nashinon se sarokar bhi hai

maslahat mujh ko bhi malhuz hai ai ham-sukhano
par mere pesh-e-nazar waqt ki raftar bhi hai

maut ke khauf se har sans ruki jati hai
zindagi aaj koi tera kharidar bhi hai

talkhi-e-haal ko hai ishrat-e-farda ka fareb
dil junun-kosh hai aur aql trahdar bhi hai

mere mahbub mujhe waqf-e-taghaful na samajh
zist ke lakh taqaze hain tera pyar bhi hai

ahal-e-guftar ki to bhid lagi hai 'akhtar'
dekhna in mein koi sahab-e-kirdar bhi hai