alfaz ki zanjiron mein jakde hue mafhum
afkar mein marbut khayalat hain manzum

is daur-e-pur-ashob ke andaz to dekho
arbab-e-khirad ahl-e-junun donon hain maghmum

ye shahr ye tanhai ye virana-e-tahzib
me'yar-e-tamaddun ka tasawwur hua ma'dum

kuchh log pareshan the hue aur pareshan
akhbar ki khabron se machi shahr mein wo dhum

ye zawiya-e-fikr hai dilchasp siyasat
sultani-e-jamhur mein kya khadim-o-makhdum