andhere ko nigalta ja raha hun
diya hun aur jalta ja raha hun

meri har samt ye sae se kyun hain
main jaise din hun dhalta ja raha hun

dhuan sa phailta jata hun bujh kar
hadon se ab nikalta ja raha hun

zawal-e-adamiyyat dekh kar main
kaf-e-afsos malta ja raha hun

mujhe to tutna hai hashr ban kar
na jaane kyun main talta ja raha hun

main zinda hun kai sadiyon ab tak
faqat chehre badalta ja raha hun