anjuman se mujhe is tarah uthane wale
ungliyan tujh pe uthaenge zamane wale

hae kuchh tujh ko nahin meri tamanna ka lihaz
meri jaanib se nazar pher ke jaane wale

sochta hun ki teri chashm-e-karam hone tak
mujh ko afsana bana denge zamane wale

raunaq-e-bazm badhana hi nahin kaam apna
hum hain sahra ko bhi gulzar banane wale

iqtiza waqt ka jo chahe kara le warna
hum na the ghair ke ehsan uthane wale

kya bataoge sabab girya-e-gham ka 'nazim'
puchh baithenge agar tum se zamane wale