apna ahd-e-wafa nibhata hun
ab use roz gungunata hun

meri himmat na puchhiye sahab
ret par kashtiyan chalata hun

do fariqon ke darmiyan aksar
main mohabbat ke pul banata hun

meri imdad aur kuchh bhi nahin
main faqat hausle badhata hun

aaj-kal pencilon se kaghaz par
dhup mein rotiyan banata hun

main kabhi dushmani nahin karta
aur ho jae to nibhata hun

faisle apne chhod kar un par
zarf logon ke aazmata hun