apne andar ka kuchh ubaal nikal
ai sukhnawar naya khayal nikal

log malbe tale dabe hue hain
chhod kaghaz qalam kudal nikal

tu bahut waqt le chuka hai mera
ab mere roz-o-mah-o-sal nikal

ya meri baat ka jawab bana
ya mere zehn se sawal nikal

dekhta hun main teri shishagari
chal zara aaine se baal nikal

jod aainda ko guzishta se
aur is mein se mera haal nikal

is ko chun-o-chara pasand nahin hai
apni baaton se qil-o-qal nikal

main tere samne pada hua hun
aaine mere khadd-o-khal nikal

tu to kahta tha sainkadon hain 'aziz'
chal koi ek hi nikal nikal