apne dil ki khoj mein kho gae kya kya log
aansu tapti ret mein bo gae kya kya log

kirnon ke tufan se bajre bhar bhar kar
raushniyan us ghat par dho gae kya kya log

sanjh-samay is kunj mein zindagiyon ki ot
baj gai kya kya bansuri ro gae kya kya log

maili chadar tan kar is chaukhat ke duwar
sadiyon ke kohram mein so gae kya kya log

gathdi kal rain ki sonti se latkae
apni dhun mein dhyan-nagar ko gae kya kya log

mithe mithe bol mein dohe ka hindol
sun sun us ko banware ho gae kya kya log