apni aankhon mein basa lo ya gira do mujh ko
qatra-e-ashk hun jo chahe saza do mujh ko

surat-e-sham-e-sar-e-bazm jala do mujh ko
subh ho jae to aanwal se bujha do mujh ko

main to bimar-e-mohabbat hun mere chaaragaro
ab to bas zulf-e-moambar ki hawa do mujh ko

ek siwa tere mujhe yaad na aae kuchh bhi
is qadar ishq mein diwana bana do mujh ko

mere dil mein na koi hasrat-e-didar rahe
kash ek bar rukh-e-zeba dikha do mujh ko

is qadar apne nazar se ho khafa thik nahin
kya khata meri hai bas itna bata do mujh ko