apni aashufta mizaji ke samar bol pade
main jo khamosh hua zakhm-e-jigar bol pade

raat yaadon ke parindon ne bahut shor kiya
jaise khwabida jaziron mein sahar bol pade

dil ne khamosh mohabbat ki tahaarat sun li
dam-e-rukhsat jo tere dida-e-tar bol pade

un se din-raat badalne ka sabab jaanna tha
shauq-e-taqlid mein gum shams-o-qamar bol pade

pahle mismar hue khwab-gharaunde 'akhtar'
phir hawaon se gale mil ke shajar bol pade