apni aur kisi se kis din rah-o-rasm-o-rifaqat thi
aati jati sans thi jis ki saat sangat thi

tujh ko khayal na aaya warna kis din itne garan the hum
ek do harf-e-murawwat socho kaun si aisi qimat thi

main bhi apni dhun mein rawan tha wo bhi apne-ap mein gum
baat ki naubat kaise aati kis ko itni fursat thi

bit chuke wo din wo zamane rahat bhari aziyyat ke
yaad kise ab kaun batae duri thi ki wo qurbat thi

kucha kucha phailen baaten qata-e-talluq-khatir ki
auron ka to zikr hi kya diwar-o-dar ko hairat thi

kitne hain jo ab tak pahunche apni zat ki manzil tak
harf-o-bayan se baat hai bahar aisi kadi masafat thi

gosha-gir faqir the hum to maslak ijz-o-niyaz 'bashir'
kyun be-sud kisi se ulajhte apni kis se adawat thi