dasht-e-ghurbat mein agar sath tumhaara hota
kyun na sadiyon ka safar hum ko gawara hota

apni tazin se kuchh waqt bacha kar jaanan
mere mahaul ki zulfon ko sanwara hota

apne masnad se zara niche utar kar tu ne
ek lamha hi mere sath guzara hota

ruk na jata wo kisi koh-e-giran ki manind
tu ne gar waqt ke dariya ko pukara hota

mere be-nur darichon mein ziya ki khatir
koi jugnu koi suraj koi tara hota