apni hasti mitae phirta hun
ranj kya kya uthae phirta hun

shab guzarti hai us ki yaadon mein
sara din ladkhadae phirta hun

ab to aadi hun dard sahne ka
ab to bas sar jhukae phirta hun

umr lambi ho meri aankhon ki
khwab tere sajae phirta hun

aakhiri fard hun qabile ka
dil mein yaaden basae phirta hun

sogwari hai mere kamre mein
hijr ke din manae phirta hun

ye mujhe kya hua hai jaan-e-jaan
main ye kya gungunae phirta hun