apni qismat ke hue sare sitare patthar
phul daman mein tere aur hamare patthar

hum bhi isa ki tarah tum se yahi kahte hain
jo gunahgar nahin hai wahi mare patthar

haq na mil pae mashaqqat ka to hota hai yahi
zulm ke samne hote hain sahaare patthar

moajiza ishq ka ye bhi hai zamane walo
mere aangan mein hue phul tumhaare patthar

dast-e-nafrat ne kiya paikar-e-iman zakhmi
muft mein ho gae badnam bechaare patthar

sone chandi ne to kuchh bhi na diya hum ko 'zafar'
ya-khuda ab meri qismat ko sanware patthar