apni tanhai zindagi kar li
zabt chhalka to shairi kar li

rang mein dhalte hue tere main ne
shakl tak apni sanwli kar li

raat bhar aasman mein bhatka
chand ne subh khud-kushi kar li

jab zaban wale be-wafa nikle
be-zabanon se dosti kar li

tu mere hasilon mein hai to nahin
phir bhi khwahish kabhi kabhi kar li

phir kiya ishq aur phir puri
jo kasar thi rahi-sahi kar li

kuchh ne chun li ghazal ki mushkil rah
kuchh ne ghabra ke naukri kar li