apnon ko sanam aise nashad nahin karte
yun chahne walon par bedad nahin karte

manzur nahin hargiz ma'shuq ki ruswai
marte hain bhale 'ashiq fariyaad nahin karte

tu tod salakhen gar hona hai riha tair
sayyaad asiron ko aazad nahin karte

shab wasl ki jaan-e-jaan har roz nahin aati
shikwon mein 'abas shab ye barbaad nahin karte

din to hai guzar jata rozi ke jhamelon mein
kis raat magar tum ko hum yaad nahin karte

bedad mein lazzat ho hai khas rawish un ki
kis din wo 'azab-e-nau ijad nahin karte

pana hai 'sada' kuchh to darkar hai jurat bhi
be-dam ki farishte bhi imdad nahin karte