asir-e-azmat-e-kirdar bhi nahin hue hain
abhi to sahab-e-dastar bhi nahin hue hain

hum ek tarah se giraftar to hue hain magar
kuchh is tarah se giraftar bhi nahin hue hain

hamesha lete hain hum khud-aziyyati ka maza
hamare dard giran-bar bhi nahin hue hain

abhi se kis liye tum ko padi hai jaane ki
abhi to band ye bazar bhi nahin hue hain

abhi khayal mein hum ne kiya hai ghar tamir
abhi to is mein giraftar bhi nahin hue hain

hazaron kaam hamare liye hain kyon tayyar
abhi to nind se bedar bhi nahin hue hain

tamam log gharon mein dubak ke ja baithen
ye shahr itne pur-asrar bhi nahin hue hain

uthen aur us ki gali mein kahin bhi ja baithen
'hanif' itne subuksar bhi nahin hue hain