asir-e-sham-o-sahar inqalab paida kar
tu sina-chaak sahi aaftab paida kar

sukun-e-dil ko fareb-e-umid kya kam hai
jo tishnagi hai muqaddar sarab paida kar

kahan wo shauq kahan wo fareb-kari-e-shauq
kahin se phir wahi ahd-e-shabab paida kar

tadap tadap ke dil-e-be-qarar rah jae
kuchh aur zulf-e-siyah pech-o-tab paida kar

nahin jo jalwa-e-yusuf nahin sahi 'shaariq'
nazar-fareb zulekha ka khwab paida kar