aziz kyon na ho phir gham tera khushi ki tarah
ki ikhtiyar bhi mera hai be-kasi ki tarah

khuda ke waste mat tod aasra dil ka
ki main ne dali hai mar-mar ke zindagi ki tarah

wo jis ko khilne se pahle hi tod le koi
teri misal hai ai dost us kali ki tarah

tumhaari kaun ada par karun yaqin ki tum
kabhi kisi ki tarah ho kabhi kisi ki tarah

nigah-e-naz mein us bakhshish-o-karam ke nisar
ki tu ne hosh bhi bakhsha to be-khudi ki tarah

na kyon ho naz tabahi-e-dil pe ai 'sahir'
ki mujh ko dalna hai mit ke zindagi ki tarah