ba-waqar lahje mein pur-asar kaha jae
dil ka haal kuchh bhi ho mukhtasar kaha jae

wusat-e-takhayyul ko baal-o-par kaha jae
shauq ki bulandi ko baam-o-dar kaha jae

kyon na hum badal dalen kohna istelahon ko
kyon na aaj qatil ko chaaragar kaha jae

zindagi ki rahon mein kaun sath deta hai
kis ko is masafat mein ham-safar kaha jae

jis taraf se wo guzren bas wo rahguzar thahre
aam raste ko kyon rahguzar kaha jae

chahe jis tarah kahiye khatm ho nahin sakta
ishq wo fasana hai umr bhar kaha jae

wo chaman ho ya sahra donon ek jaise hain
ek ajib uljhan hai kis ko ghar kaha jae

dil ki raushni ko log kyon sahar nahin kahte
waqt ke ujale ko kyon sahar kaha jae

gumrahi ki manzil mein kis ko aaj ai 'jauhar'
rahzan kaha jae rahbar kaha jae