baad muddat jo main ai charkh-e-kuhan yaad aaya
kya sitam koi naya mushfiq-e-man yaad aaya

sher kahta tha ki mazmun-e-dahan yaad aaya
ek muamma ye dam-e-fikr-e-sukhan yaad aaya

ahl-e-duniya ko kisi din na hui fikr-e-adam
kya musafir hain ki jin ko na watan yaad aaya

dekh kar abr-e-bahaari meri nisbat badli
sehn-e-gulshan mein dil-e-tauba-shikan yaad aaya

rishta-e-jaan mein girah pad gai uljhan ke sabab
dil ko jab gesu-e-pur-pech-o-shikan yaad aaya

pa ke sar-chashma-e-haiwan jo phir aaya ulta
kya 'sikandar' ko tera chah-e-zaqan yaad aaya

mit gai dil ke na hone se wo daghon ki bahaar
ai 'nazar' waqt-e-khizan hum ko chaman yaad aaya