baad muddat ke kabhi mujh se mili kahne lagi
meri parchhai bhi mujh ko ajnabi kahne lagi

wo kaha main ne zaban se jo mere dil mein na tha
mere dil ki baat meri khamushi kahne lagi

zarra zarra hai yahan raushan usi ke nur se
main usi ki ek shua hun raushni kahne lagi

dekh kar unchai mere khwab ki parwaz ki
main hun bebas tere aage bebasi kahne lagi

tu kahan rahti hai puchha tha kisi ne ek din
main ghamon ke sath rahti hun khushi kahne lagi