bichha hua koi tanhaiyon ka jal na tha
tere firaq se pahle ye ghar ka haal na tha

thake to yun ki hamein aarzu thi sae ki
saubaton se safar ki badan nidhaal na tha

kuchh aise mod pe bichhde the hum mohabbat mein
mujhe bhi ranj use bhi koi malal na tha

nigah tu ne kisi aur hi pe ki hoti
jo hum shikasta dilon ka tujhe khayal na tha

kabhi kabhi koi baadal baras bhi jata tha
zamin-e-shahr ka itna bura to haal na tha

chhupa hua mera dushman tha khud mere andar
so apne-ap se bachne ka kuchh sawal na tha

gae dinon ka tujhe dhyan tak nahin 'khawar'
tera wo ishq yahi hai jise zawal na tha