badh aai ganw ko dariya baha kar le gaya
ek pyasa dusre pyase ko aa kar le gaya

ruh mein sadiyon ka sannata basa kar le gaya
main jo arz-e-shahr se sahra utha kar le gaya

zehn ki almariyon mein dhul si udne lagi
koi alfaz-o-maani sab chura kar le gaya

rah gaya qaem phir us ki pak-bazi ka bharam
phir wo ek shaitan se khud ko bacha kar le gaya

pahle ki manind lutf-e-abla-pai nahin
kaun meri rah ke kante utha kar le gaya

kaudiyon ke mol 'tahir' bik gai jins-e-hunar
mal-e-muflis har koi qimat ghata kar le gaya