baat hum jab bhi saf karte hain
log kyon ikhtilaf karte hain

qabil-e-ehtiram hain wo log
dushmanon ko muaf karte hain

bolte jab hain phul se lahje
pattharon mein shigaf karte hain

rashk aata hai aise chehron par
jin ka shishe tawaf karte hain

hausla khub hai charaghon ko
jang hawa ke khilaf karte hain

main ne bakhshi hai zindagi fan ko
ahl-e-fan e'tiraf karte hain

dil hai 'danish' faqir ka hujra
gham yahan etakaf karte hain