baaton baaton mein kiya khun aaj ek dil-gir ka
wah kya kahna teri rangini-e-taqrir ka

be-sabab kab hai tadapna aashiq-e-dil-gir ka
sine se paikan nikalta hai tumhaare tir ka

nau giraftaron ki wahshat ka bhi ho kuchh imtihan
aaj sunna chahiye nala nai zanjir ka

bais-e-hairat hua bimari-e-dil ka asar
dekho ab to rang udta hai meri taswir ka

bas bas ai zalim kahan tak imtihan-e-zabt-e-ah
ab to dam ghutne laga hai aashiq-e-dil-gir ka

mar gaya hai aap ka wahshi udasi chhai hai
didani hai aaj aalam khana-e-zanjir ka

dil bhi dhadka aap ka zulfen bhi bal khane lagin
aur abhi zindan mein nala hai meri zanjir ka