ye rang-o-bu hain kuchh din ke nazaron ka bharosa kya
bahaaren kal kahan hongi bahaaron ka bharosa kya

na itrana ki hai tum ko mayassar daman-e-sahil
kinare tut jate hain kinaron ka bharosa kya

hum apni zat hi ko anjuman taslim karte hain
idare tut jate hain idaron ka bharosa kya

zamane mein nahin anjam achchha sar uthane ka
sitare tut jate hain sitaron ka bharosa kya

'nasim' is darja fakhr achchha nahin yaran-e-mahfil par
sahaare tut jate hain sahaaron ka bharosa kya